اسلام آباد۔31اکتوبر(اے پی پی) پاکستان سکھ برادری دی سہولت سانڳے ویزے کوں آن لائن کرݙتے ،امریکی، کینڈین اتے یوکے پاسپورٹ رکھݨ آلی سکھ کمیونٹی دے لوک آن لائن فارم جمع کروا سڳسن تے 30 منٹ اچ ویزا گھن سڳسن ۔ اے ڳالھ وفاقی وزیر داخلہ محسن نقوی امریکا توں آئے سکھ یاتریاں دے 44 رکنی وفد کوں ملاقات اچ آکھی ۔وفاقی وزیرداخلہ محسن نقوی امریکا توں آئے سکھ یاتریاں دی سٹیٹ گیسٹ ہاؤس اچ میزبانی کیتی ۔وفد دی قیادت ڈاکٹر دلویرسنگھ پنوں، سرجیت سنگھ ہوتھی،رنجیت سنگھ کاہلوں تے لکشمن سنگھ کریندے پئے ہن ۔ وفاقی وزیرداخلہ محسن نقوی پاکستان آوݨ تے سکھ یاتریاں کوں جی آیاں کوں آکھیا ۔ وزیر داخلہ محسن نقوی آکھیے پاکستان آوݨ سانڳے سکھ برادری کوں مسئلیں دا سامݨا کرݨا پوندا ہئی کجھ عرصہ وزیراعلی پنجاب رہیا تاں سکھ برادری دے مسئلے مکاوݨ دی کوشش کیتی ایں سانڳے پاکستان سکھ برادری دی سہولت سانڳے ویزے کوں آن لائن کرݙتے ۔ اے سہولت امریکا ، کینیڈا اتے برطانیہ اچ رہݨ آلے بھارتی نژاد سکھ برادری سانڳے وی ہے ۔ محسن نقوی آکھیے سکھ برادری سانڳے زیادہ سہولتاں ݙیوݨ ساݙی اولین ترجیح اے ، تساں سال اچ ݙاہ واری پاکستان آؤ ہر واری خوش آمدید آکھسوں ۔ آن لائن ویزا سانڳٖ صرف فارم پر کرݨا اے جیں دے بعد 30 منٹ اچ ویزہ جاری کرݙتا ویسی ، انھاں آکھیے جیویں مسلماناں سانڳے سعودی عرب اے ایوں سکھ کمیونٹی سانڳے پاکستان اے ۔ پاکستان اچ سکھ برادری دیاں ٻیاں جہیں اوپن کریسوں ۔ وزٹ سانڳے اجازت نامے دی لوڑھ نہ ہوسی ۔ حسن ابدال، کرتار پور، ننکانہ صاحب اتے لاہور نال تساں آپݨیاں ٻیاں مذہبی جہیں تے وی ونڄ سڳسوں جیڑھے وی مسئلے ہن انھاں کوں حل کریسوں ایں ویلھے سال اچ 50 ہزار توں ھک لکھ سکھ یاتری آندن ساݙی خواہش اے تعداد 10 لکھ تھیوے نینگر وی آون ۔ پاکستان 124 ملکاں سانڳے ویزا فری کیتے۔انھاں سکھ برادری دا خیر مقدم کریندے آکھیے تساں کرکٹ می?? ݙیکھݨ پاکستان آؤ ، چیمپئنز ٹرافی سانڳے آؤ ، پاک بھارت می?? ݙیکھݨ آؤ ایں سانڳے خصوصی ک??ٹہ رکھیندے پیوں ، بھارت توں وی ٻہوں لوکاں می?? ݙیکھݨ آوݨا اے ایں سانڳے خصوصی انتظامات کریندے پیوں امریکا توں آئے سکھ یاتریاں دے وفد مہمان نوازی تے وزیر داخلہ محسن نقوی دا شکریہ ادا کریندے آکھیے فری آن لائن ویزا تھیوݨ توں ٻہوں سہولت ملی اے ۔ پاکستان ساݙے دل جت ڳھدن اساں پاکستان اچ سرمایہ کاری اچ وی دلچسپی رکھیندوں ۔ ایں موقع تے معروف صنعتکار کاشف اشفاق تے حکام وی موجود ہن۔
سکھ برادری دی سہولت سانڳے ویزے کوں آن لائن کرݙتے ،وفاقی وزیرداخلہ
مضمون کا ماخذ : بک آف ڈیڈ
متعلقہ مضامین
